काठमाडौं, साउन १७ गते,
नेपालमा पाँच हजारभन्दा बढी मानिस डेङ्गुबाट सङ्क्रमित भएका छन् । इपिडिमियोलोजी तथा रोग नियन्त्रण महाशाखाका अनुसार सुनसरीमा मात्रै आधाभन्दा बढी सङ्क्रमित रहेका छन् ।
महाशाखाका निर्देशक रुद्रप्रसाद मरासिनीका अनुसार गत माघयता पाँच हजार ६८८ जनामा डेङ्गुको सङ्क्रमण देखिएको छ । तीमध्ये सुनसरीमा मात्रै तीन हजार ४८६ जनामा डेङ्गु को सङ्क्रमण देखिएको छ ।
मरासिनीले संक्रमण बढ्नुमा जनताको लापरबाही रहेको आरोप लगाए । केही दिनदेखि लगातार पानी परिरहेको छ र मानिसहरूले सरसफाइमा ध्यान दिएका छैनन्, जसले गर्दा डेङ्गु को फैलावट डरलाग्दो रूपमा बढेको छ।
एक साताअघिसम्म नेपालमा चार हजार ६१९ जनामा डेङ्गु को सङ्क्रमण देखिएकोमा एक सातामै यो सङ्ख्या बढेर पाँच हजार ६८८ पुगेको छ ।
डेङ्गु एडिस एजिप्टी र एडिस अल्बोपिक्टस प्रजातिको लामखुट्टेको टोकाइबाट सर्छ । तिनीहरूले सफा पानीमा अण्डा पार्छन्। अण्डा लार्भामा परिणत हुन्छ र लार्भा वयस्क लामखुट्टेमा परिणत हुन्छ। यस्तो लामखुट्टेको टोकाइ डरलाग्दो हुन्छ किनभने यसले डेङ्गुको संक्रमण गराउँछ । त्यसैले घरवरपरको खाल्डाखुल्डी हटाउनुपर्छ ।
१० जिल्ला बढी प्रभावित
सुनसरी, धादिङ, कास्की, दार्चुला, काठमाडौँ, संखुवासभा, म्याग्दी, मोरङ, कञ्चनपुर र झापा बढी प्रभावित छन् । सुनसरीमा मात्रै तीन हजार ४८६, काठमाडौँमा ९६ र झापामा ५६ जनामा सङ्क्रमण देखिएको छ ।
सबैभन्दा बढी कोशी प्रदेशमा तीन हजार ८२१ र सबैभन्दा कम मधेश प्रदेशमा २६ जनामा डेङ्गु देखिएको छ ।
नेपालमा गत माघ यता डेङ्गुका कारण चार जनाको मृत्यु भइसकेको छ ।
