काठमाडौं – विमानस्थल भित्र ब्यागेज तोडफोड, चोरीका घटनाबारे यात्रुका गुनासा बढेसँगै नेपाल नागरिक उड्डयन प्राधिकरण, त्रिभुवन विमानस्थल कार्यालयले कडाइ सुरु गरेको छ । सो क्रममा ब्यागेज व्यवस्थापनमा खटिने नेपाल एयरलाइन्सका कर्मचारीलाई अब खल्तीरहित पोशाक दिइने भएको छ । यसको प्रबन्ध नेपाल एयरलाइन्सले मिलाउने निर्णय भएको त्रिभुवन विमानस्थलका महाप्रवन्धक प्रतापबाबु तिवारीले जानकारी दिए ।
उनका अनुसार सुपरभाइजरको काम प्रभावकारी बनाउन, समयमा उपकरण मर्मत गर्न, ब्यागेज ह्याण्डिलिङ तालिम दिन, सामान लोडिङ, अफ लोडिङ समयमा हाइ रिजोलुसनको ग्रोप्रो क्यामराको व्यवस्था गर्न र खल्तीरहित पोशाकको व्यवस्था नेपाल एयरलाइन्सले गर्ने गरी निर्णय गरिएको हो ।
यसअघि बिहीबार त्रिभुवन विमानस्थलमा संस्कृति, पर्यटन तथा नागरिक उड्डयन मन्त्री सुदन किरातीले आकस्मिक बैठक गरी यस बारे प्रश्न गरेका थिए ।
त्रिभुवन विमानस्थलका महाप्रवन्धक तिवारीका अनुसार विमानस्थलको शौचालयमा बज्ने म्यूजिक सिस्टम नयाँ जडानको काम भइरहेको छ । रात्रि उडान सकिएपछि शौचालयको डीप क्लिनिङ गर्न थालिएको छ ।
रासस
